Практична настава, обука во сопствените капацитети за учениците од средното стручно училиште „Илинден“, со отворена можност за стипендирање талентирани ученици и вработување по завршеното образование опфаќа Меморандумот за соработка помеѓу општината Илинден и компанијата ОКТА.
Меморандумот денеска официјално го потпишаа градоначалникот на општина Илинден и главниот извршен директор на ОКТА, Виктор Папаконстантиноу.
– Успешната соработка со бизнис секторот е дел од стратегијата на oпштина Илинден за намалување на невработеноста, што е еден од приоритетите поради кој и се воведе средно образование кое што профилира кадри според потребите на локалната бизнис заедница. Ми причинува голема чест што денес ја продолжуваме успешната соработка со компанијата ОКТА и со потпишувањето на Меморандумот за соработка ги подигаме нормите, вредностите и стандардите во образованието, го подобруваме квалитетот и ефикасноста на стручното образование во средното стручно училиште „Илинден“, истакна градоначалникот на општина Илинден.
Додаде дека вакви меморандуми општината веќе потпиша со компаниите МЕПСО, Џонсон Контролс, Ван Хол и Џонсон Мети.
– Со обезбедувањето практична настава во најголемите компании во општина Илинден учениците по завршувањето на четврта година од училиштето ќе излегуваат со многу знаења и практика, подготвени веднаш да се вклучат во процесот на производство, рече градоначалникот на општина Илинден.
Главниот извршен директор на ОКТА, Виктор Папаконстантину изрази задоволство од потпишаниот Меморандумот со општина Илинден за дополнително образование на младите.
– Практичната примена на теоретското знаење е од огромно значење. ОКТА е дел од мултинационална група компании со високо ниво на експертиза во енергетскиот сектор. Едукативниот дел ќе опфаќа различни сегменти од работата на компанијата и средношколците ќе бидат присутни во средина каде работите се движат со огромна брзина, со што ќе имаат можност да научат многу. Сигурен сум дека некои од нив во ОКТА ќе препознаат компанија каде би сакале да работат, изјави Папаконстантину.
Паралелно со потпишувањето на Меморандумот настанот беше искористен општина Илинден да се вклучи во општествено одговорната кампања на ОКТА „Шанса за живот“, за опремување со инкубатори и друга неопходна апаратура што е потребна за нормално функционирање на одделението за интензивна нега на Клиниката за детски болести. Во рамките на кампањата, која што почна минатиот месец и ќе трае до крајот на ноември годинава, ОКТА донира финансиски средства и дополнително издвојува сума од секоја продажба на гориво на нејзините бензински пумпи.
Структурата на кампањата е создадена да влијае и да ги вклучи сите граѓани низ цела држава и да ја подигне нивната свест за моќта да се предизвика промена.
Comments are closed.